СВЯТА НАРОДНАГА ГУЛЯННЯ "КУПАЛЛЕ" ТРАДЫЦЫЙНА ПРАЙШОЎ ПА ЎСІХ КУТКАХ СТОЛІНШЧЫНЫ

08/07/2024 16:07

Свята Івана Купалы прыпадае на час летняга сонцастаяння і адзначаецца беларускім народам з даўніх часоў. Шматвяковая традыцыя выконваецца і на Століншчыне.

Лічылася, што менавіта ў гэты дзень прырода дасягае свайго найвышэйшага росквіту. У купальскую ноч скачуць праз агонь, шукаюць скарбы і папараць-кветку, а таксама спяваюць старажытныя песні, пускаюць вянкі па вадзе і варожаць.

Насычана, весяла прайшла Купальская ноч у розных населеных пунктах нашага раёна.

Разнастайная канцэртная праграма, карагоды вакол вогнішча пад зорным ліпеньскім небам падарылі людзям вялізны зарад бадзёрасці, весялосці і станоўчых эмоцый.

Самае загадкавае і прыгожае свята лета атрымалася на славу, людзі добра правялі час і адпачылі. Кожны адчуў дыханне шматвяковай народнай традыцыі, сувязь пакаленняў…

Безумоўна, свята Івана Купалы садзейнічае яднанню жыхароў не толькі вёскі і раёна, але і вобласці, краіны, тым самым дапамагаючы захаванню нашай цудоўнай культуры.